ນັກຊື້ຂາຍຮູ້ສຶກໂລ່ງໃຈໃນຊ່ວງຕົ້ນວັນພຸດ ຫຼັງຈາກເຫັນຄວາມຜັນຜວນຢ່າງໜັກໃນມື້ກ່ອນ ຂະນະທີ່ກຸ່ມ Fed ສາຍເຂັ້ມງວດກຳລັງຊອກຫາຂໍ້ມູນເພີ່ມເຕີມ ເພື່ອສະໜັບສະໜູນທັດສະນະຫຼ້າສຸດທີ່ຊີ້ວ່າ ທະນາຄານກາງສະຫະລັດອາດເລື່ອນການຫຼຸດອັດຕາດອກເບ້ຍ. ນອກຈາກນັ້ນ, ຕະຫຼາດຮົງກົງກັບມາເປີດຫຼັງຈາກວັນພັກຍາວ ແລະບໍ່ມີປັດໄຈດ້ານພູມິລັດຖະສາດທີ່ເປັນລົບສຳຄັນ ຈຶ່ງເຮັດໃຫ້ຜູ້ຮ່ວມຕະຫຼາດຫຼຸດຂະໜາດການເຄື່ອນໄຫວຮຸນແຮງໃນວັນອັງຄານລົງ.
ເຖິງຢ່າງນັ້ນ, ເງິນເຟີ້ທີ່ສູງໃນສະຫະລັດໄດ້ເສີມຄວາມເຫັນຂອງຕະຫຼາດທີ່ຄາດວ່າ Fed ຈະເລື່ອນການຫຼຸດອັດຕາດອກເບ້ຍ ຂະນະທີ່ການປັບຕົວລົງຂອງຕະຫຼາດຮຸ້ນສະຫະລັດໄດ້ຊ່ວຍເສີມຜົນຕອບແທນພັນທະບັດຄັງເງິນສະຫະລັດ ແລະເງິນໂດລາສະຫະລັດ.
ເມື່ອເງິນໂດລາສະຫະລັດແຂງຄ່າ ສິນຊັບທີ່ມີຄວາມສ່ຽງສູງກວ່າ ເຊັ່ນ ສິນຄ້າໂພກພັນ ແລະສະກຸນເງິນກຸ່ມ Antipodean ໄດ້ຫຼຸດລົງສູ່ລະດັບຕ່ຳສຸດໃນຮອບຫຼາຍມື້ ຂະນະທີ່ສະກຸນເງິນຫຼັກກໍຫຼຸດລົງຢ່າງຊັດເຈນເມື່ອທຽບກັບເງິນໂດລາສະຫະລັດ. ແຕ່ນ້ຳມັນດິບເປັນຂໍ້ຍົກເວັ້ນ ໂດຍປັບຕົວຂຶ້ນສູ່ລະດັບສູງສຸດປະຈຳເດືອນ ຍ້ອນປັດໄຈພື້ນຖານທີ່ແຂງແກ່ນ.
ສະກຸນເງິນຄຣິບໂຕທີ່ນິຍົມເຊັ່ນ BTCUSD ແລະ ETHUSD ກໍບໍ່ຕ່າງກັນ ໂດຍຢຸດການປັບຂຶ້ນໃນຊ່ວງຫຼາຍມື້ທີ່ຜ່ານມາໄວ້ທີ່ລະດັບສູງສຸດໃນຮອບຫຼາຍມື້ ກ່ອນຈະມີແຮງຊື້ເຂົ້າມາໃນຊ່ວງຕົ້ນວັນພຸດ ສ່ວນໃຫຍ່ແມ່ນຍ້ອນຄວາມເຊື່ອໝັ້ນວ່າຈະມີການອະນຸມັດ Spot ETF.
ຕໍ່ໄປນີ້ແມ່ນຄວາມເຄື່ອນໄຫວຫຼ້າສຸດຂອງສິນຊັບຫຼັກ:
ຕົວເລກເງິນເຟີ້ຂອງສະຫະລັດທີ່ລາຍງານໃນມື້ກ່ອນສູງກວ່າທີ່ຄາດໄວ້ ແລະຍິ່ງເສີມຄວາມເຫັນພ້ອມໃນຕະຫຼາດວ່າ ທະນາຄານກາງສະຫະລັດ (Fed) ຈະເລື່ອນການຫຼຸດອັດຕາດອກເບ້ຍທີ່ລໍຄອຍກັນມາດົນອອກໄປ. ສິ່ງນີ້ສົ່ງຜົນດີຕໍ່ດັດຊະນີເງິນໂດລາສະຫະລັດ ແລະອັດຕາຜົນຕອບແທນ.
ຄວນສັງເກດວ່າ ດັດຊະນີລາຄາຜູ້ບໍລິໂພກຂອງສະຫະລັດ (CPI) ເພີ່ມຂຶ້ນສູງກວ່າທີ່ຕະຫຼາດຄາດການໄວ້ ແລະສູງກວ່າຂໍ້ມູນກ່ອນໜ້າໃນລາຍເດືອນ (MoM). ຂະນະທີ່ CPI ທີ່ບໍ່ລວມລາຄາອາຫານ & ພະລັງງານ ຫຼືທີ່ເອີ້ນວ່າ Core CPI ສະທ້ອນໃຫ້ເຫັນຢ່າງຊັດເຈນກວ່າວ່າອັດຕາດອກເບ້ຍຈຳເປັນຕ້ອງຢູ່ໃນລະດັບສູງຕໍ່ໄປເປັນເວລາດົນ.
ຫຼັງຈາກຕົວເລກເງິນເຟີ້ ແລະເງິນເຟີ້ພື້ນຖານຂອງສະຫະລັດໃນເດືອນມັງກອນອອກມາສູງ, ໂອກາດທີ່ Fed ຈະຫຼຸດອັດຕາດອກເບ້ຍໃນເດືອນພຶດສະພາກໍຫຼຸດລົງມາເຫຼືອ 40% ຈາກ 70% ໃນມື້ກ່ອນ. ແຕ່ໂອກາດທີ່ Fed ຈະຫຼຸດອັດຕາດອກເບ້ຍໃນເດືອນມີນາມີພຽງ 10% ເທົ່ານັ້ນ, ຂະນະທີ່ຕະຫຼາດຄາດວ່າມີໂອກາດເກືອບ 50% ທີ່ການຫຼຸດອັດຕາດອກເບ້ຍຈະເກີດຂຶ້ນໃນເດືອນມິຖຸນາ. ຄວນສັງເກດວ່າ Jeffrey Gundlach, ຜູ້ກໍ່ຕັ້ງຄົນສຳຄັນຂອງບໍລິສັດກອງທຶນປ້ອງກັນຄວາມສ່ຽງ DoubleLine Capital, ຕັດຄວາມເປັນໄປໄດ້ທີ່ Fed ຈະຫຼຸດອັດຕາດອກເບ້ຍໃນປີ 2024 ແລະເຮັດໃຫ້ຝ່າຍຊື້ເງິນໂດລາສະຫະລັດຍັງຄຸມເກມໄດ້.
ບໍ່ພຽງແຕ່ຄວາມກັງວົນວ່າ Fed ຈະດຳເນີນນະໂຍບາຍເຂັ້ມງວວດເທົ່ານັ້ນ ແຕ່ຜົນງານທີ່ອ່ອນແອຂອງຕະຫຼາດຮຸ້ນສະຫະລັດກໍຍັງຊ່ວຍໜູນເງິນໂດລາສະຫະລັດ ແລະຜົນຕອບແທນພັນທະບັດຄັງເງິນສະຫະລັດ ເຊິ່ງກົດດັນລາຄາສະກຸນເງິນຫຼັກ ສິນຄ້າໂພກພັນ ແລະສະກຸນເງິນອອສເຕຣເລຍກັບນິວຊີແລນ. ທັງນີ້ ໃນວັນອັງຄານ ຮຸ້ນຂະໜາດນ້ອຍຂອງສະຫະລັດປັບຕົວລົງລາຍວັນຫຼາຍທີ່ສຸດ ນັບຕັ້ງແຕ່ເດືອນມິຖຸນາ 2022.
ດ້ວຍເຫດນີ້ ລາຄາຄຳຈຶ່ງປັບຫຼຸດລົງລາຍວັນຫຼາຍທີ່ສຸດນັບຕັ້ງແຕ່ຕົ້ນເດືອນທັນວາ 2023. ແນວໃດກໍຕາມ ລາຄານ້ຳມັນບໍ່ສົນໃຈການແຂງຄ່າຂອງເງິນໂດລາສະຫະລັດ ທີ່ມີປັດໄຈໜູນຈາກຂໍ້ມູນເງິນເຟີ້ສະຫະລັດທີ່ດີກວ່າຄາດ ລວມທັງການເພີ່ມຂຶ້ນຢ່າງຫຼວງຫຼາຍຂອງສະຕັອກນ້ຳມັນດິບ ຕາມການສຳຫຼວດຂອງສະຖາບັນ American Petroleum Institute (API) ຊຶ່ງເປັນອົງກອນເອກະຊົນ ແລະລາຄາກໍຂຶ້ນໄປເຮັດລະດັບສູງສຸດປະຈຳເດືອນ. ສາເຫດອາດກ່ຽວຂ້ອງກັບລາຍງານປະຈຳເດືອນຂອງອົງການປະເທດຜູ້ສົ່ງອອກນ້ຳມັນ (OPEC). ທັງນີ້ ກຸ່ມປະເທດຜູ້ສົ່ງອອກນ້ຳມັນໄດ້ປັບປຸງຄາດການການເຕີບໂຕຂອງເສດຖະກິດໂລກສຳລັບປີ 2024 ແລະ 2025 ໂດຍຄົງທັດສະນະຕໍ່ຄວາມຕ້ອງການນ້ຳມັນໄວ້ຄືເກົ່າ.
ໃນຕະຫຼາດອື່ນໆ ຄວາມກັງວົນຕໍ່ການປັບຫຼຸດຄາດຄະເນການເຕີບໂຕທາງເສດຖະກິດຂອງລັດຖະບານເຢຍລະມັນ ປະສົມກັບການແຂງຄ່າໃນວົງກວ້າງຂອງເງິນໂດລາສະຫະລັດ ແລະຕົວເລກຄວາມເຊື່ອໝັ້ນທາງເສດຖະກິດ ZEW ທີ່ອອກມາປະສົມປົນເປ ໄດ້ກົດດັນລາຄາ EURUSD. ການເຄື່ອນໄຫວນີ້ຍັງສອດຄ່ອງກັບຄຳເຫັນໃນແນວຜ່ອນຄາຍຂອງ Philip Lane ຫົວໜ້ານັກເສດຖະສາດຂອງທະນາຄານກາງເອີຣົບ (ECB) ທີ່ກ່າວວ່າ ກ້າວຕໍ່ໄປຈະເປັນການຫຼຸດອັດຕາດອກເບ້ຍ ແຕ່ເວລາດຳເນີນການຈະຂຶ້ນກັບຂໍ້ມູນ. ນອກຈາກນັ້ນ ຕົວເລກເງິນເຟີ້ຂອງອັງກິດທີ່ອ່ອນແອ ລວມກັບຂໍ້ມູນ CPI ຂອງສະຫະລັດທີ່ແຂງແກ່ງໃນມື້ກ່ອນ ໄດ້ກົດດັນ GBPUSD ໃຫ້ລົງໃກ້ລະດັບຕ່ຳສຸດປະຈຳອາທິດ ເຖິງແມ່ນວ່າໄລຍະຫຼັງມານີ້ເງິນໂດລາສະຫະລັດຈະຂາດແຮງຂັບເຄື່ອນກໍຕາມ.
ໃນອີກດ້ານໜຶ່ງ ການສົ່ງສັນຍານດ້ວຍວາຈາຂອງເຈົ້າໜ້າທີ່ຍີ່ປຸ່ນ ປະກອບກັບການປັບຫຼຸດລົງຂອງອັດຕາຜົນຕອບແທນພັນທະບັດ ເຮັດໃຫ້ USDJPY ຖອຍລົງຈາກລະດັບສູງສຸດໃນຮອບ 3 ເດືອນ. ທັງນີ້ Kanda ຮອງລັດຖະມົນຕີກະຊວງການເງິນຍີ່ປຸ່ນຝ່າຍວຽກງານສາກົນ ແລະ Suzuki ລັດຖະມົນຕີກະຊວງການເງິນ ໄດ້ສະໜັບສະໜູນການແຊກແຊງຕະຫຼາດເພື່ອຈຳກັດການເຄື່ອນໄຫວຂອງເງິນເຢນ. ແຕ່ Kazuo Ueda ຜູ້ວ່າການທະນາຄານກາງຍີ່ປຸ່ນ (BoJ) ໄດ້ສົ່ງສັນຍານວ່າ ລາວບໍ່ໄດ້ພົບກັບການຄັດຄ້ານຫຼາຍຕໍ່ການຂຶ້ນດອກເບ້ຍ ເຊິ່ງຊ່ວຍໜູນໃຫ້ເງິນເຢນຟື້ນຕົວ.
ນອກຈາກນັ້ນ ຍອດຂາຍຍ່ອຍຂອງນິວຊີແລນໃນເດືອນມັງກອນຟື້ນຕົວຂຶ້ນ ແຕ່ດັດຊະນີລາຄາຂາຍສົ່ງ (WPI) ຂອງອິນເດຍຫຼຸດລົງໃນເດືອນດັ່ງກ່າວ.
ໃນມື້ນີ້ ຕົວເລກ GDP ໄຕມາດ 4 ຊຸດທຳອິດຂອງເຂດເອີໂຣ ແລະຄຳປາໄສຂອງ Andrew Bailey ຜູ້ວ່າການທະນາຄານກາງອັງກິດ (BoE) ຈະເປັນປະເດັນທີ່ຖືກຈັບຕາ. ແຕ່ຈະມີການໃຫ້ຄວາມສົນໃຈຫຼາຍເປັນພິເສດກັບຜົນຕອບແທນພັນທະບັດ ແລະຄຳປາໄສຂອງບັນດາຜູ້ກຳນົດນະໂຍບາຍທະນາຄານກາງ. ເຖິງແມ່ນວ່າການເຄື່ອນໄຫວໃນຕະຫຼາດຫຼ້າສຸດຈະເລີ່ມພັກຕົວ ແຕ່ຄວາມກັງວົນວ່າ Fed ຈະດຳເນີນນະໂຍບາຍເຂັ້ມງວດຍັງເຮັດໃຫ້ຝ່າຍທີ່ຄາດວ່າເງິນໂດລາຈະແຂງຄ່າຈັບຕາເບິ່ງເງິນໂດລາສະຫະລັດ.
ຂໍໃຫ້ທ່ານໂຊກດີໃນການຊື້ຂາຍ!
